الوطن صغير ما بيساع بيانو – علي حاطوم

0

علي حاطوم

خواطر

الوطن صغير ما بيساع بيانو
وصرله سنين واقف بمكانه
وكل ما نحن نكبر
هو يصغر أكتر
وبطلنا على مقاسه
وبطلنا نحن اساسه
تغرب عنا، وتغربنا عنه
ضاع منا، وضعنا منه
ولما حنينا رجعنالو
لقيناه بعدو بمكانه
بناس جداد وناسينا
ومن ذاكرته ماحينا
حتى ضحكاتنا واسامينا
محاها عن حيطانه
***

الوطن صغير ما بيساع بيانو
وماتت النغمة، وإنتحرت ألحانه
وكل حلم من أحلامي
علق ع حدود بلادي
مرق العمر قدامي
والحلم مات ع الهادي
وهيدا حب ظلموه
وهيدا شب ختير
وهيدا اللي قطفوه
متل شتلة زعتر
وهيدا اللي صلبوه
وورده بعد ما زهّر
وهيدا اللي رسموه
بريشة الموت وألوانه
***
غريبي كيف الوطن
صار المنفى والسجن
غريبي كيف الفتن
قلبت الفرحة لحزن
والاغرب كيف الوطن الكبير
صار صغير ما بيساع بيانو…

Share.

About Author

باسل عبدالله - تواصل مدني

Comments are closed.